0:00
/
1ܒܗ̇ܝ ܥܕܵܢܵܐ: ܟܲܕ ܓ̰ܡܸܥܠܗܘܿܢ ܪܸ̈ܒܘܵܬܹܐ ܕܟܸܢܫܹ̈ܐ ܪܵܒܵܐ: ܕܵܐܟ̣ܝܼ ܕܕܵܝܫܝܼ ܗ݇ܘܵܘ ܚܲܕَ ܠܗ̇ܘ ܐ݇ܚܹܪ݇ܢܵܐ: ܫܘܼܪܹܐܠܹܗ ܠܹܐܡܵܪܵܐ ܠܬܲܠܡܝܼܕܘܼ̈ܗܝ ܩܵܕَܡܵܝܬܵܐ: ܗَܘܹܝܡܘܿܢ ܗܸܫܝܵܪ ܒܓܵܢܵܘܟ̣ܘܿܢ ܡ̣ܢ ܚܡܝܼܪܵܐ ܕܦܪ̈ܝܼܫܹܐ: ܕܝܼܠܹܗ ܡܲܣܲܒ̣ ܒܐܲܦܹ̈ܐ. 2ܐܝܼܢܵܐ ܠܲܝܬ ܡܸܢܕܝܼ ܟܘܼܣܝܵܐ ܕܠܵܐ ܦܵܐܹܫ ܓܸܠܝܵܐ: ܘܠܵܐ ܕܛܘܼܫܝܵܐ ܕܠܵܐ ܦܵܐܹܫ ܝܕܸܥܝܵܐ. 3ܣܵܒܵܒ ܟܠ ܕܒܚܸܫܟܵܐ ܐܡܸܪܵܘܟ̣ܘܿܢ: ܒܒܲܗܪܵܐ ܒܸܬ ܦܵܐܹܫ ܫܸܡܥܝܵܐ: ܘܡܸܢܕܝܼ ܕܒܟܘܼܚܝܵܬܹ̈ܐ ܒܢܵܬܵܐ ܦܘܼܬܦܸܬܠܵܘܟ̣ܘܿܢ: ܥܲܠ ܐ݇ܓܵܪ̈ܵܘܵܬܹܐ ܒܸܬ ܦܵܐܹܫ ܡܘܼܟܪܸܙܵܐ. 4ܘܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ ܕܵܘܣܬܝܼ̈: ܠܵܐ ܙܵܕܥܝܼܬܘܿܢ ܡ̣ܢ ܕܐܵܢܝܼ ܕܩܵܛܠܝܼ ܦܲܓ̣ܪܵܐ: ܘܡ̣ܢ ܒܵܬَܪ ܗܵܕܵܐ ܠܲܝܬ ܠܗ݇ܘܿܢ ܡܸܢܕܝܼ ܙܵܘܕܵܐ ܠܸܥܒ̣ܵܕܵܐ. 5ܐܝܼܢܵܐ ܒܸܬ ܡܲܚܙܸܢܵܘܟ̣ܘܿܢ ܡ̣ܢ ܡ̇ܢ ܙܵܕܥܝܼܬܘܿܢ: ܙܕܸܥܡܘܿܢ ܡ̣ܢ ܕܗ̇ܘ ܕܡ̣ܢ ܒܵܬَܪ ܕܩܵܛܸܠ ܐܝܼܬ ܠܹܗ ܗܘܼܟܡܵܐ ܠܸܕܪܵܝܵܐ ܒܓܹܗܲܢܵܐ: ܗܹܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܡ̣ܢ ܕܗ̇ܘ ܙܕܸܥܡܘܿܢ. 6ܚܲܡܫܵܐ ܨܸܦܪܹ̈ܐ ܠܹܐ ܦܵܝܫܝܼ ܙܘܼܒܢܹܐ ܒܬܪܹܝ ܫܵܗ̈ܝܹܐ: ܘܚܕܵܐ ܡܸܢܵܝܗܝ ܠܹܐ ܝ݇ܠܵܗ̇ ܢܫܝܼܬܵܐ ܩܵܕَܡ ܐܲܠܵܗܵܐ. 7ܐܸܠܵܐ ܐܘܼܦ ܡܸܙܝܵܬܹ̈ܐ ܕܪܹܫܵܘܟ̣ܘܿܢ ܟܠܵܝܗܝ ܡܸܢܝܹܐ ܝܢܵܐ. ܠܵܐ ܗܲܕܟ̣ܵܐ ܙܵܕܥܝܼܬܘܿܢ: ܡ̣ܢ ܪܵܒܵܐ ܨܸܦܪܹ̈ܐ ܙܵܘܕܵܐ ܝܬܘܿܢ. 8ܘܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܕܡܵܘܕܹܐ ܒܝܼܝܼ ܩܵܕَܡ ܒܢܲܝ̈ܢܵܫܵܐ: ܐܘܼܦ ܒܪܘܿܢܹܗ ܕܐ݇ܢܵܫܵܐ ܒܸܬ ܡܵܘܕܹܐ ܒܝܹܗ ܩܵܕَܡ ܡܲܠܲܐܟܹ̈ܐ ܕܐܲܠܵܗܹ̈ܐ. 9ܐܝܼܢܵܐ ܡ̇ܢ ܕܣܵܪܸܒ̣ ܠܝܼ ܩܵܕَܡ ܒܢܲܝ̈ܢܵܫܵܐ: ܒܸܬ ܦܵܐܹܫ ܣܪܝܼܒ̣ܵܐ ܩܵܕَܡ ܡܲܠܲܐܟܹ̈ܐ ܕܐܲܠܵܗܵܐ. 10ܘܟܠ ܕܐܵܡܸܪ ܗܹܡܸܙܡܵܢ ܥܲܠ ܒܪܘܿܢܹܗ ܕܐ݇ܢܵܫܵܐ: ܒܸܬ ܦܵܐܹܫ ܫܒ̣ܝܼܩܵܐ ܐܸܠܹܗ: ܐܝܼܢܵܐ ܡ̇ܢ ܕܥܲܠ ܪܘܼܚܵܐ ܕܩܘܼܕܫܵܐ ܓܵܕܸܦ: ܠܹܐ ܦܵܐܹܫ ܫܒ̣ܝܼܩܵܐ ܐܸܠܹܗ. 11ܘܐܝܼܡܲܢ ܕܡܲܝܬَܝܝܼ ܠܵܘܟ̣ܘܿܢ ܠܟܢܘܼܫܝܵܬܹ̈ܐ ܩܵܕَܡ ܪܹ̈ܫܵܢܹܐ ܘܗܵܟܝܼܡܹ̈ܐ: ܠܵܐ ܐܵܟ̣ܠܝܼܬܘܿܢ ܚܲܡ ܕܵܐܟ̣ܝܼ ܝܲܢ ܡܘܼܕܝܼ ܒܸܬ ܓ̰ܲܘܸܒܝܼܬܘܿܢ: ܝܲܢ ܡܘܼܕܝܼ ܒܸܬ ܐܵܡܪܝܼܬܘܿܢ. 12ܣܵܒܵܒ ܪܘܼܚܵܐ ܕܩܘܼܕܫܵܐ ܒܸܬ ܡܵܠܸܦ ܠܵܘܟ̣ܘܿܢ ܗܲܪ ܒܗ̇ܝ ܣܵܥܲܬ ܡܸܢܕܝܼ ܕܘܵܓ̰ܸܒ ܝܼܠܹܗ ܕܐܵܡܪܝܼܬܘܿܢ. 13ܘܐَܡܝܼܪܹܗ ܐܸܠܹܗ ܐ݇ܢܵܫܵܐ ܡ̣ܢ ܟܸܢܫܵܐ: ܡܲܠܦܵܢܵܐ: ܐَܡܘܿܪ ܠܐܵܚܘܿܢܝܼ ܕܦܵܠܹܗ ܥܲܡܝܼ ܡܝܼܪܲܬܓܵܪܘܼܬܵܐ. 14ܐܝܼܢܵܐ ܐَܡܝܼܪܹܗ ܐܸܠܹܗ: ܐ݇ܢܵܫܵܐ: ܡܵܢܝܼ ܩܲܡ ܡܲܩܸܡܠܝܼ ܥܲܠܵܘܟ̣ܘܿܢ ܕܲܝܵܢܵܐ ܘܦܲܠܝܼܵܢܵܐ. 15ܘܐَܡܝܼܪܹܗ ܐܸܠܵܝܗܝ: ܚܙܹܝܡܘܿܢ ܘܗَܘܹܝܡܘܿܢ ܗܸܫܝܵܪ ܡ̣ܢ ܟܠܵܗ̇ ܛܲܡܲܥܟܵܪܘܼܬܵܐ: ܣܵܒܵܒ ܠܵܐ ܒܙܵܘܕܘܿܢܝܘܼܬܵܐ ܕܡܵܐܠ ܠܐ݇ܢܵܫܵܐ ܝܼܢܵܐ ܚܲܝܘܼ̈ܗܝ. 16ܘܗܘܼܡܙܸܡܠܹܗ ܘܐَܡܝܼܪܹܗ ܡܵܣܵܠܵܐ ܐܸܠܵܝܗܝ: ܚܲܕَ ܐ݇ܢܵܫܵܐ ܕܵܘܠܲܬܡܲܢܕ ܡܘܼܬَܝ݇ܠܵܗ̇ ܐܸܠܹܗ ܐܲܪܥܹܗ ܗܵܨܝܼܠܹܐ ܪܵܒܵܐ. 17ܘܚܫܸܒ̣ܠܹܗ ܒܓܵܢܹܗ ܘܐَܡܝܼܪܹܗ: ܡܘܼܕܝܼ ܥܵܒ̣ܕܸܢ: ܣܵܒܵܒ ܠܲܝܬ ܠܝܼ ܐܲܝܟܵܐ ܕܓ̰ܲܡܥܸܢ ܗܵܨܝܼܠܝܼ̈. 18ܘܐَܡܝܼܪܹܗ: ܐܵܗܵܐ ܒܸܬ ܥܵܒ̣ܕܸܢ: ܒܸܬ ܣܵܬܪܸܢ ܐܲܢܒܵܪ̈ܝܼ: ܘܒܸܬ ܒܵܢܸܢ ܕܒܘܼܫ ܓܘܼܪܹ̈ܐ: ܘܒܸܬ ܓ̰ܲܡܥܸܢ ܬܵܡܵܐ ܟܠܵܗ̇ ܕܲܚܠܝܼ ܘܡܸܢܕܝܼܝܼ̈. 19ܘܒܸܬ ܐܵܡܪܸܢ ܠܓܵܢܝܼ: ܓܵܢܝܼ: ܐܝܼܬ ܠܵܟ̣ܝ ܪܵܒܵܐ ܡܸܢܕܝܵܢܹ̈ܐ: ܕܡܘܼܬܒ̣ܵܐ ܝܢܵܐ ܩܵܐ ܪܵܒܵܐ ܫܸܢܹ̈ܐ: ܦܘܼܡܝ ܢܝܼܚܬܵܐ: ܐَܟ̣ܘܿܠܝ: ܫܬܝܼ: ܥܒ̣ܘܿܕܝ ܒܘܼܣܵܡܵܐ. 20ܐܝܼܢܵܐ ܐَܡܝܼܪܹܗ ܐܸܠܹܗ ܐܲܠܵܗܵܐ ܝܵܐ ܟܝܼܡ ܗܵܘܢܵܐ: ܒܐܵܗܵܐ ܠܲܝܠܹܐ ܓܵܢܘܼܟ ܒܸܬ ܛܵܠܒܝܼ ܠܵܗ̇ ܡܸܢܘܼܟ: ܘܐܲܢܹܐ ܕܗܘܼܕܸܪܘܼܟ: ܠܡܵܢܝܼ ܒܸܬ ܗܵܘܝܼ. 21ܗܲܕܟ̣ܵܐ ܝܠܹܗ ܡ̇ܢ ܕܡܲܬܸܒ̣ ܠܓܵܢܹܗ ܚܲܙܝܼܢܹ̈ܐ: ܘܒܲܐܠܵܗܵܐ ܠܹܐ ܝܠܹܗ ܕܵܘܠܲܬܡܲܢܕ. 22ܘܐَܡܝܼܪܹܗ ܠܬܲܠܡܝܼܕܘܼ̈ܗܝ: ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܵܐ ܐܵܟ̣ܠܝܼܬܘܿܢ ܚܲܡ ܠܓܵܢܵܘܟ̣ܘܿܢ: ܡܘܼܕܝܼ ܐܵܟ̣ܠܝܼܬܘܿܢ: ܘܠܵܐ ܠܦܲܓ̣ܪ̈ܵܘܟ̣ܘܿܢ: ܡܘܼܕܝܼ ܠܵܒ̣ܫܝܼܬܘܿܢ. 23ܣܵܒܵܒ ܓܵܢܵܐ ܙܵܘܕܵܐ ܝ݇ܠܵܗ̇ ܡ̣ܢ ܡܹܐܟ̣ܘܼܠܬܵܐ ܘܦܲܓ̣ܪܵܐ ܡ̣ܢ ܠܒܸܫܬܵܐ. 24ܚܘܼܪܘܿܢ ܒܢܲܥܒܹ̈ܐ: ܕܠܹܐ ܙܵܪܥܝܼ: ܘܠܹܐ ܚܵܨܕܝܼ: ܘܠܲܝܬ ܠܗ݇ܘܿܢ ܟܘܼܚܝܼܵܬܹ̈ܐ ܝܲܢ ܐܲܢܒܵܪܹ̈ܐ: ܘܐܲܠܵܗܵܐ ܟܹܐ ܬܲܪܣܹܐ ܠܗ݇ܘܿܢ. ܟܡܵܐ ܐܲܚܬܘܿܢ ܙܵܘܕܵܐ ܝܬܘܿܢ ܡ̣ܢ ܛܲܝܪܹ̈ܐ. 25ܐܝܼܢܵܐ ܐܲܝܢܝܼ ܡܸܢܵܘܟ̣ܘܿܢ ܟܲܕ ܐܵܟܼܸܠ ܚܲܡ ܟܹܐ ܡܵܨܹܐ ܠܡܲܙܝܘܼܕܹܐ ܥܲܠ ܩܘܼܡܬܹܗ ܚܕܵܐ ܝܲܡܝܼܢܵܐ. 26ܘܐܸܢ ܗܲܕܟ̣ܵܐ ܐܘܼܦ ܙܥܘܿܪܬܵܐ ܠܹܐ ܡܵܨܹܝܬܘܿܢ: ܩܵܡܘܿܕܝܼ ܥܲܠ ܡܸܢܕܝܼ ܐ݇ܚܹܪ݇ܢܵܐ ܒܹܐܟ̣ܵܠܵܐ ܝܬܘܿܢ ܚܲܡ. 27ܚܘܼܪܘܿܢ ܒܫܘܼܫܲܢܹ̈ܐ ܕܵܐܟ̣ܝܼ ܟܹܐ ܓܲܪܘܸܣܝܼ: ܠܹܐ ܓ̰ܲܗَܝܝܼ: ܘܠܹܐ ܥܵܙܠܝܼ: ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܘܼܦ ܫܠܹܝܡܘܿܢ ܒܟܠܹܗ ܚܸܩܪܹܗ ܠܹܐ ܗ݇ܘܵܐ ܠܒ̣ܝܼܫܵܐ ܐܲܝܟܼ ܚܲܕَ ܡ̣ܢ ܕܐܲܢܹܐ. 28ܐܝܼܢܵܐ ܐܸܢ ܠܓܸܠܵܐ ܕܐܸܕܝܘܿܡَ ܓܵܘ ܚܲܩܠܵܐ ܝܠܹܗ: ܘܒܩܵܝܕܲܡܬܵܐ ܟܹܐ ܦܵܐܹܫ ܕܸܪܝܵܐ ܓܵܘ ܬܵܢܘܿܪܵܐ: ܐܲܠܵܗܵܐ ܗܲܕܟ̣ܵܐ ܟܹܐ ܡܲܠܒܸܫ: ܟܡܵܐ ܙܵܘܕܵܐ ܐܸܠܵܘܟ̣ܘܿܢ: ܝܵܐ ܟܝܼܡ ܗܲܝܡܵܢܘܼܬܵܐ. 29ܘܐܲܚܬܘܿܢ ܠܵܐ ܒܵܥܹܝܬܘܿܢ ܡܘܼܕܝܼ ܐܵܟ̣ܠܝܼܬܘܿܢ: ܘܡܘܼܕܝܼ ܫܵܬܹܝܬܘܿܢ: ܘܠܵܐ ܒܵܕܹܐ ܚܝܵܠܵܘܟ̣ܘܿܢ. 30ܣܵܒܵܒ ܐܲܢܹܐ ܟܠܵܝܗܝ ܛܵܝܸܦܹ̈ܐ ܕܥܵܠܡܵܐ ܟܹܐ ܒܵܥܝܼ ܠܗ݇ܘܿܢ: ܐܝܼܢܵܐ ܒܵܒܵܘܟ̣ܘܿܢ ܟܹܐ ܝܵܕܸܥ ܕܐܸܠܵܘܟ̣ܘܿܢ ܠܵܙܸܡ ܝܼܢܵܐ ܐܲܢܹܐ. 31ܐܝܼܢܵܐ ܒܥܹܝܡܘܿܢ ܡܲܠܟܘܼܬܹܗ ܕܐܲܠܵܗܵܐ: ܘܐܲܢܹܐ ܟܠܵܝܗܝ ܒܸܬ ܦܵܝܫܝܼ ܡܘܼܙܝܸܕܹܐ ܐܸܠܵܘܟ̣ܘܿܢ. 32ܠܵܐ ܙܵܕܥܸܬ: ܦܸܣܩܵܐ ܙܥܘܿܪܵܐ: ܣܵܒܵܒ ܕܒܣܸܡܠܵܐ ܠܹܗ ܒܵܒܵܘܟ̣ܘܿܢ ܕܝܵܗَܒܸܠ ܠܵܘܟ̣ܘܿܢ ܡܲܠܟܘܼܬܵܐ. 33ܙܵܒܢܘܿܢ ܡܸܢܕܝܼܵܘܟ̣ܘܿܢ: ܘܗܲܒَܠܘܿܢ ܐܸܪܘܵܢܵܐ: ܬܵܪܨܘܿܢ ܠܵܘܟ̣ܘܿܢ ܟܸܣܝܵܬܹ̈ܐ ܕܠܹܐ ܒܵܠܝܼ: ܘܚܲܙܝܼܢܵܐ ܕܠܹܐ ܬܵܝܡܵܐ ܒܫܡܲܝܵܐ: ܐܲܝܟܵܐ ܕܓܹܢܵܒ̣ܵܐ ܠܹܐ ܩܲܪܒܸܢ: ܘܓ̰ܲܢܓ ܠܹܐ ܡܲܚܪܸܒ̣. 34ܣܵܒܵܒ ܐܲܝܟܵܐ ܕܝܼܠܵܗ̇ ܚܲܙܝܼܢܵܘܟ̣ܘܿܢ: ܬܵܡܵܐ ܒܸܬ ܗܵܘܹܐ ܐܘܼܦ ܠܸܒܵܘܟ̣ܘܿܢ. 35ܗܵܘܝܼ ܐܣܝܼܪܹܐ ܚܵܨܵܘ̈ܟ̣ܘܿܢ: ܘܒܲܗَܪܘܼܢܹܐ ܫܪ̈ܵܝܵܘܟ̣ܘܿܢ. 36ܘܗَܘܹܝܡܘܿܢ ܒܸܕܡܵܝܵܐ ܠܐ݇ܢܵܫܹ̈ܐ ܕܣܵܦܪܝܼ ܠܐܵܓ̣ܵܝܵܝܗܝ: ܐܝܼܡܲܢ ܕܕܵܝܸܪ ܡ̣ܢ ܒܹܝܬ ܚܠܘܼܠܵܐ: ܕܗ̇ܝ ܥܕܵܢܵܐ ܕܐܵܬܹܐ ܘܬܲܩܬܸܩ: ܕܲܪܣܵܥܲܬ ܦܵܬܚܝܼ ܐܸܠܹܗ. 37ܛܘܼܒ̣ܵܐ ܠܐܵܢܝܼ ܪܹ̈ܓܵܘܵܬܹܐ: ܐܲܝܢܝܼ ܕܐܵܬܹܐ ܐܵܓ̣ܵܝܵܝܗܝ ܘܡܵܫَܟ̰ܸܚ ܠܗ݇ܘܿܢ ܪܥܝܼܫܹܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܐܵܣܸܪ ܚܵܨܹܗ: ܘܒܸܬ ܡܲܬܝܸܒ̣ ܠܗ݇ܘܿܢ: ܘܒܸܬ ܐܵܬܹܐ ܘܥܵܒܸܕ ܠܗ݇ܘܿܢ ܚܸܠܡܲܬ. 38ܘܐܸܢ ܐܵܬܹܐ ܒܒܲܕܠܵܐ ܕܬܪܹܝ: ܝܲܢ ܕܬܠܵܬَܐ: ܘܡܵܫَܟ̰ܸܚ ܗܲܕܟ̣ܵܐ: ܛܘܼܒ̣ܵܐ ܠܐܵܢܝܼ ܪܹ̈ܓܵܘܵܬܹܐ. 39ܐܝܼܢܵܐ ܐܵܗܵܐ ܝܕܸܥܡܘܿܢ: ܕܐܸܢ ܝܵܕܸܥ ܗ݇ܘܵܐ ܡܵܪܹܐ ܒܲܝܬܵܐ ܒܐܲܝܢܝܼ ܣܵܥܲܬ ܐܵܬܹܐ ܗ݇ܘܵܐ ܓܹܢܵܒ̣ܵܐ: ܒܸܬ ܦܵܐܹܫ ܗ݇ܘܵܐ ܪܥܝܼܫܵܐ: ܘܠܹܐ ܫܵܒܸܩ ܗ݇ܘܵܐ ܕܗܵܘܹܐ ܒܸܙܥܝܵܐ ܒܲܝܬܹܗ. 40ܐܘܼܦ ܐܲܚܬܘܿܢ ܗܲܕܟ̣ܵܐ ܗَܘܹܝܡܘܿܢ ܗܵܙܸܪ: ܣܵܒܵܒ ܕܒܗ̇ܝ ܣܵܥܲܬ ܕܠܹܐ ܝܬܘܿܢ ܒܸܚܫܵܒ̣ܵܐ ܒܹܐܬܵܝܵܐ ܝܠܹܗ ܒܪܘܿܢܹܗ ܕܐ݇ܢܵܫܵܐ. 41ܘܐَܡܝܼܪܹܗ ܐܸܠܹܗ ܟܹܐܦܵܐ: ܡܵܪܲܢ: ܐܸܠܲܢ ܒܹܐܡܵܪܵܐ ܝܘܸܬ ܠܐܵܗܵܐ ܡܵܣܵܠܵܐ ܝܲܢ ܐܘܼܦ ܠܟܠ ܐ݇ܢܵܫܵܐ. 42ܘܐَܡܝܼܪܹܗ ܐܸܠܹܗ ܡܵܪܲܢ: ܒܲܣ ܡܵܢܝܼ ܝܠܹܗ ܢܵܙܝܼܪ ܡܗܘܼܡܢܵܐ ܘܥܵܩܸܠܕܵܪ: ܕܡܲܩܸܡ ܠܹܗ ܐܵܓ̣ܵܝܹܗ ܥܲܠ ܚܸܠܡܲܬܹܗ: ܕܝܵܗَܒܸܠ ܡܹܐܟ̣ܘܼܠܬܵܐ ܒܙܲܒ̣ܢܵܗ̇. 43ܛܘܼܒ̣ܵܐ ܠܗ̇ܘ ܪܹܓܵܐ ܕܟܲܕ ܐܵܬܹܐ ܐܵܓ̣ܵܝܹܗ ܡܵܫَܟ̰ܸܚ ܠܹܗ ܒܸܥܒ̣ܵܕܵܐ ܗܲܕܟ̣ܵܐ. 44ܒܬܪܘܼܨܬܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ. ܕܒܸܬ ܡܲܬܸܒ̣ ܠܹܗ ܥܲܠ ܟܠܹܗ ܡܸܢܕܝܹܗ. 45ܐܝܼܢܵܐ ܐܸܢ ܐܵܡܸܪ ܗ̇ܘ ܪܹܓܵܐ ܒܠܸܒܹܗ: ܐܵܓ̣ܵܝܝܼ ܥܲܪܩܘܼܠܹܐ ܝܠܹܗ ܠܹܐܬܵܝܵܐ: ܘܫܵܪܹܐ ܠܸܡܚܵܝܵܐ ܠܪܹ̈ܓܵܘܵܬܹܐ ܘܠܚܹܕܲܡܝܵܬܹ̈ܐ: ܘܠܹܐܟ̣ܵܠܵܐ ܘܠܸܫܬܵܝܵܐ ܘܠܸܪܘܵܝܵܐ. 46ܒܸܬ ܐܵܬܹܐ ܐܵܓ̣ܵܝܹܗ ܕܗ̇ܘ ܪܹܓܵܐ ܒܝܵܘܡܵܢܹ̈ܐ ܕܠܹܐ ܚܵܫܸܒ̣: ܘܒܣܵܥܲܬ ܕܠܹܐ ܝܵܕܸܥ: ܘܒܸܬ ܦܲܠܹܐ ܠܹܗ ܠܬܪܹܝ: ܘܡܲܬܸܒ̣ ܣܵܡܹܗ ܥܲܡ ܕܐܵܢܝܼ ܕܠܹܐ ܝܢܵܐ ܡܗܘܼܡܢܹ̈ܐ. 47ܘܪܹܓܵܐ ܐܲܝܢܝܼ ܕܝܕܸܥܠܹܗ ܪܸܙܵܝܵܐ ܕܐܵܓ̣ܵܝܹܗ: ܘܠܵܐ ܗܘܼܕܸܪܹܗ: ܘܠܵܐ ܥܒܸܕܠܹܗ ܐܲܝܟܼ ܪܸܙܵܝܹܗ: ܒܸܬ ܦܵܐܹܫ ܡܸܚܝܵܐ ܪܵܒܵܐ. 48ܐܝܼܢܵܐ ܗ̇ܘ ܕܠܵܐ ܝܕܸܥܠܹܗ ܘܥܒܸܕܠܹܗ ܡܸܢܕܝܼ ܕܚܵܫܸܚ ܠܡܲܚܘܵܬܹ̈ܐ: ܒܸܬ ܦܵܐܹܫ ܡܸܚܝܵܐ ܚܲܕَܟ̰ܵܐ. ܣܵܒܵܒ ܟܠ ܕܦܸܫܠܹܗ ܝܘܼܗَܒ̣ܵܐ ܐܸܠܹܗ ܪܵܒܵܐ: ܪܵܒܵܐ ܒܸܬ ܦܵܐܹܫ ܛܠܝܼܒܵܐ ܡܸܢܹܗ: ܘܠܗ̇ܘ ܕܦܸܫܠܹܗ ܣܘܼܦܝܵܐ ܒܝܹܗ ܪܵܒܵܐ: ܒܘܼܫ ܙܵܘܕܵܐ ܒܸܬ ܛܵܠܒܝܼ ܒܐܝܼܕܹܗ. 49ܢܘܼܪܵܐ ܐَܬܹܐܠܝܼ ܕܕܵܪܸܢ ܒܐܲܪܥܵܐ: ܘܡܘܼܕܝܼ ܒܵܣܡܵܐ ܠܝܼ ܐܸܢ ܡ̣ܢ ܩܵܕَܡ ܐܵܕܝܼܵܐ ܗܵܘܹܐ ܬܸܦܝܵܐ. 50ܘܡܲܥܡܘܿܕܝܼܬܵܐ ܐܝܼܬ ܠܝܼ ܕܥܵܡܕܸܢ: ܘܟܡܵܐ ܡܘܼܠܝܸܨܵܐ ܝܘܸܢ ܗܲܠ ܕܦܵܝܫܵܐ ܬܘܼܡܸܡܬܵܐ. 51ܒܸܚܫܵܒ̣ܵܐ ܝܬܘܿܢ ܕܐَܬܹܐܠܝܼ ܕܫܲܝܢܵܐ ܕܵܪܸܢ ܒܐܲܪܥܵܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܵܐ: ܐܸܠܵܐ ܦܲܠܵܥܝܵܬܹ̈ܐ. 52ܣܵܒܵܒ ܡ̣ܢ ܐܵܕܝܼܵܐ ܒܸܬ ܗܵܘܝܼ ܚܲܡܫܵܐ ܒܚܲܕَ ܒܲܝܬܵܐ ܦܘܼܠܝܹܐ: ܬܠܵܬَܐ ܥܲܠ ܬܪܹܝ: ܘܬܪܹܝ ܥܲܠ ܬܠܵܬَܐ. 53ܒܸܬ ܦܵܐܹܫ ܦܘܼܠܝܼܵܐ: ܒܵܒܵܐ ܥܲܠ ܒܪܘܿܢܹܗ: ܘܒܪܘܿܢܵܐ ܥܲܠ ܒܵܒܹܗ: ܝܸܡܵܐ ܥܲܠ ܒܪܵܬܘܼܗ̇: ܘܒܪܵܬܵܐ ܥܲܠ ܝܸܡܘܼܗ̇: ܚܡܬܵܐ ܥܲܠ ܟܵܠܬܘܼܗ̇: ܘܟܵܠܬܵܐ ܥܲܠ ܚܡܵܬܘܼܗ̇. 54ܘܐَܡܝܼܪܹܗ ܠܟܸܢܫܹ̈ܐ: ܐܝܼܡܲܢ ܕܚܵܙܹܝܬܘܿܢ ܥܢܵܢܵܐ ܒܸܙܪܵܩܵܐ ܡ̣ܢ ܡܲܥ̱ܪܒ̣ܵܐ: ܕܲܪܣܵܥܲܬ ܟܹܐ ܐܵܡܪܝܼܬܘܿܢ: ܡܸܛܪܵܐ ܒܹܐܬܵܝܵܐ ܝ݇ܠܵܗ̇: ܘܟܹܐ ܗܵܘܝܵܐ ܗܲܕܟ̣ܵܐ. 55ܘܐܝܼܡܲܢ ܦܵܘܚܵܐ ܕܬܲܝܡܢܵܐ ܡܵܚܹܐ: ܟܹܐ ܐܵܡܪܝܼܬܘܿܢ: ܚܸܡܵܐ ܒܸܬ ܗܵܘܹܐ: ܘܟܹܐ ܗܵܘܹܐ. 56ܢܵܣܒܲܝ̈ ܒܐܲܦܹ̈ܐ: ܦܵܬܵܐ ܕܐܲܪܥܵܐ ܘܕܫܡܲܝܵܐ ܟܹܐ ܝܵܕܥܝܼܬܘܿܢ ܕܦܵܪܫܝܼܬܘܿܢ: ܐܝܼܢܵܐ ܐܵܗܵܐ ܙܲܒ̣ܢܵܐ ܕܵܐܟ̣ܝܼ ܠܹܐ ܝܬܘܿܢ ܒܝܼܕܵܥܝܵܐ ܠܸܦܪܵܫܵܐ. 57ܐܝܼܢܵܐ ܩܵܡܘܿܕܝܼ ܐܘܼܦ ܡ̣ܢ ܓܵܢܵܘܟ̣ܘܿܢ ܠܹܐ ܕܵܝܢܝܼܬܘܿܢ ܗܵܩܘܼܬܵܐ. 58ܣܵܒܵܒ ܐܝܼܡܲܢ ܕܐܵܙܸܠَܬ ܥܲܡ ܕܲܠܩܘܼܒܼܠܘܼܟܼ ܠܟܸܣ ܗܵܟܝܼܡ: ܗܵܠܵܐ ܒܐܘܼܪܚܵܐ ܝܘܸܬ: ܗܲܒَܠ ܬܹܐܓ̣ܘܼܪܬܵܐ [ܡܸܢܕܝܼ] ܕܦܵܪܩܸܬ ܡܸܢܹܗ: ܠܵܐ ܗَܘܹܐ ܕܠܵܒܸܠ ܠܘܼܟܼ ܠܟܸܣ ܕܲܝܵܢܵܐ: ܘܕܲܝܵܢܵܐ ܣܵܦܹܐ ܠܘܼܟܼ ܠܦܲܪܵܫ: ܘܦܲܪܵܫ ܕܵܪܹܐ ܠܘܼܟܼ ܓܵܘ ܒܹܝܬ ܐܲܣܝܼܪܹ̈ܐ. 59ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܹܐ ܦܵܠܛܸܬ ܡ̣ܢ ܬܵܡܵܐ: ܗܲܠ ܕܝܵܗَܒܸܬ ܫܵܡܘܿܢܵܐ ܐَܚܵܪܵܝܵܐ.